By 
0
0
Centenario della fondazione del PSd’Az. Antonio Moro, Presidente del Partidu Sardu – Partito Sardo d’Azione:
– A Tzent’anni! Est sa bonaura de sos tatharesos a sos chi festan sos annos. “Cuntendi da Abà” est su chi azunghen sos chi non ponen trèmenes a su poderiu de su Babbu Soberanu.
Un’azunta chi oe bi deghet pro festare su primu sèculu de vida de su Partidu Sardu. Chent’annos cun su matessi nùmene e su matessi sìmbulu, sa pandela de sos bator moros, e chena jambare ideales e valores.
Unu bisu tramudadu in realidade pro cuddos òmines de gabbale chi aian fatu sa Prima Gherra mondiale.
Sos chi su 17 de abrile de su 1921, in su cunventu de sos Iscolopos de Aristanis, dae sa madrighe de su Sòtziu de sos cumbatentes aian fatu nàschere unu partidu politicu, solu sardu e solu pro dare amparu a sa Sardigna.
Oe est una die nòdida pro sos sardistas ma est fintzas una responsabilidade manna pro chie est a intro de su Psd’Az. Ammentare sos indicos chi nos aiat dadu Camillu Bellieni in su primu cungressu de su Partidu nos azuat a cumprender mezus s’istòria nostra: soberania populare, autonomia amministrativa, autonomia doganale e chistione sotziale.
B’at cosa de pius importu, in su tempus presente, de torrare a su pòpulu su podere de detzidere in domo sua, oe chi semus presos dae sas burocratzias europeas, oe chi si torran a bìere bìculos de autoritarismu e s‘Autonomia est istada traita?
Chena faeddare de su chi est capitende a Comunas e provintzias, lassadas chena dinare e privadas de sa cumpetentzias issoro: una traitoria de su chi naraiat su documentu de su Cungressu de su 1921 subra s’autonomia amministrativa pensada comente unu sistema isparghinadu, in sas manos de sos sindigos e de sos presidentes de sas provintzias.
Ma oe si podet fintzas mudare su cuntzetu ‘etzu de autonomia doganale e pensare a unu sistema nou pro sas pagamentas.
Su Partidu Sardu, dae sos primos annos de vida, naraiat chi su cummerciu devet esser liberu ca est custa s’unica manera de torrare alenu a sas Regiones de su meridione e pro las pònnere a su matessi livellu de cussas de su Nord.
No b’at meda de nàrrere, intamas, subra sa bella pensada de ponner sa chistione sotziale in prima linea in su 1921. Tando, est beru, sa Sardigna e s’Italia si torraian a ponnere in motu a pustis de su disacatu de sa Prima gherra mondiale, ma semus seguros chi oe sa chistione contet pius pagu de tando?
Oe s’economia sarda est in pelea pro more de sos dannos fatos dae sa pandemia.
Ma no est solu custu chi nos ponet in anneu: sos sardos pius de àteros pòpulos pagan sos efetos feos de sa globalizatzione, comintzende dae sa disparidade tra ricos e disamparados.
Gai e totu pro àteras chistiones chi non permitin de tennere ispera ‘ona pro su tempus benidore: prestidos bancarios, energia, trasportos. Su chi mancat est sa capatzidade de sos guvernos de pònnere regulas a s’economia capitalistica.
Bastat a biere su chi capitat in sos trasportos aereos e in mare, o sa ‘irgonza de su preju de su late cun sos pastores leados a minispreju e tratados che pidores.
Sos chent’annos de su Partidu Sardu, oe ghia de sa Regione, sunu su signale de un’impignu grae e galaberosu pro sos tempos nostros chi nos azuat a parare fronte a su disafiu de su tempus chi at a bènnere. Cal’est custu disafiu? Isparghinare in totue sa sienda manna de valores e ideas chi an marcadu su caminu de sos Bator Moros in unu seculu.
Identidade, limba, cultura, indipendentzia, federalismu, isvilupu e tribagliu sanu: sun custas sas prendas de un’istoria noa chi cherimus immannitare cun s’azudu de totu sos sardos chi tenen in coro sa terra insoro.
Cun sos sardos, diat a narrer Bellieni, chi comente a nois revudan su dogma de s’italianidade e pensan chi su de essere italianos non podet negare a sa Sardigna sos diritos suos.
Sas menzus bonauras, duncas, a su Partidu Sardu pro chi sigat a restare aunidu ca solu gai at a resessire a muntennere s’unidade de su pòpulu sardu.
Chent’annos in salude a òmines e feminas sardistas, a chie nos at jutu finas a inoghe, a chie non b’est pius, a chie est inoghe e b’at a essere cras.
Fortza Paris Sardigna –
Antonio Moro
Presidente del Partidu Sardu – Partito Sardo d’Azione
By 
